ප්‍රකෘතිය අතරමැද

මේක ඉල්ල ගත්තු ජීවිතයක්
ණයට ගත්තු හීන ගොඩක්
ගොඩ ගහගෙන, පොදි ගහගෙන
අරන් යන්න මරණින් පස්සේ
එහා ලෝකෙටත්..

මේක හදාගත්තු රවුමක්
එකා වටේ යැවෙන එකක්
හසරක් නොදත් වංකගිරියක්
නොදකින නොපෙනෙන
ඈතින් සිත්තම් වෙන
නුදුරින් මැකී යන
ඇත්තක් හොයාන යන ගමනක්

අපි ආයෙත්
ආයෙ ආයෙමත්
රවුමකට අත් අල්ලන්
‘කිරි කිරි බෝලේ’
කියන සෙල්ලමක්
කෙළවරක් නැති ත්‍රිකෝණ
හතරැස් කොටුවක්
ඇතුළට වැටෙන තැනක්

ඈතින් ඈතට, දෑසින් එහාට
ඇවිදගෙන යද්දී දුරින් දැනෙන
මිරිඟුවක සේයාරුවක්
වැහි නැති අකුණු රාමුවක්
හදවත් එක්ක ‘ෆුට්බෝල්’ ගහන
වැලි නැති කාන්තාරයක සිත්තමක්

දිය රෙද්දෙන් බෙල්ල කපපු
පරපුරක පළිගැනීමක්
සංස්කෘතිකය සදාචාරය ඇතුළේ
ඇකිළුණු දූපතක
හිර වුණු මනස් වල
කල එළි මඟුලක්

මේක අවසානයක් නැති
ආරම්භයක
ඉසියුම් නැවතුමක්
අම්බලමක්,
අහඹුවක් හෙම නොවේ
අවැසිතාවයක්…

© 2015 Pamuditha Zen Anjana

Advertisements